KUALA LUMPUR: Laimi misual minung 4 nih Imbi Taxi stand pawng Internet Game dawr ah September 21, zinglei sml 5:00 am hrawngah hriamnam he a rak luh hnawhtu minung 4 chungah minung 3 cu CDT (Pudu) nih September 27 ah an tlaih khawh cang hna.
Mah internet game dawr ah hriamnam he an luh lioah CCTV nih record a rak tuah hna caah tubantuk in an tlaih khawh hna hi a si.
Hriamnam he Game dawr ah a lutmi minung 4 chungah an tlaih khawh cangmi hna minung 3 cu; Thangtlangpeng Congthia khuami Pu Chan Khar le Pi Ely hna i an fapa Pa Bawi Ram Uk Lian, kum 18, Hmawngtlang khuami Cung Kung le Mara khuami Pi Sui Vang hna i an fapa Van Lawm Sang, kum 20, Phaipha khuami Pu Ngun Ceu le Pi Far Sung an fapa Pa Kyawkyaw Lwin, kum 18 hna hi an tlaihmi hna cu an si. An tlaih khawh rih lomi hi Kya-inn khua ah a ummi Biak Lan fapa Kap Lian Cung, kum 20, a si i anih hi Ipoh ah rianṭuanmi a si caah an tlai kho rih lo, tiah thawng theih a si.
An tlaih cangmi minung 3 chungah Pa Van Lawm Sang le Pa Kyawkyaw Lwin hi Malaysia ah kum 3 renglo a um cangmi an si i UNHCR a lut veve cangmi an si. Pa Bawi Ram Uk Lian hi Malaysia ah a phaknak kum 1 fai te a si. An pathum ning in CDAC zungah an hren lio hna a si. Mah Game dawr an luh hnawh hna lio ah dawr chungah internet a ṭhumi hi minung pakhat hmanh an um lo lio caan ah a si i minutes 5 tluk lawng dawr chungah an um hi a si.
Game dawr a hngakmi nih cun, RM 480 le telefawn 1 a kan chuh, tiah an ti. Mah an tlaihmi hna 3 nih an chim ningah cun RM 330 le telefawn 1 hi kan chuhmi hna a si, tiah an chim.
Hi thil a can ni ah internet dawr a ngeitu Tuluk bosspa nih CDAC chairman sin ah thawng a thanh colh i September 22 ah CCTV nih record a tuahmi ṭepphal cu a rak pek. A voikhat nak i a pekmi ṭepphal cu zoh khawh lo a si i September 24 ni ah a rak pek ṭhan. Cu ṭepphal zoh hnu lawngah laimi chung kan si kong le neihniam ah a ummi an si kong theih a si. Minung an theih hna hnuah CDAC chairman nih ACR, CRC le CCF hruaitu hna a auh hna i biaruahnak a ngeih hna. Cu hnuah Pudu CDT bu sin ah CDAC nih thawng an hei thanh hna i, September 27 Cacawn nithum ni ah Pudu plaza pawng lakphakti dawr ah CDT nih an tlaih hna hi a si.
Malaysia CDAC chairman Pu Lal Siam Mawi nih, " Minung 4 chungah 3 lawng tlaih an si. Anmah lak ah aa tel vemi Kya-inn ummi Kap Lian Cung hi Ipoh ah rianṭuanmi a si caah tlaih khawh a si rih lo. Hi kong he pehtlai in anmah Kya-inn khuami bomh kan hal hna i, a rauh hlan ah tlaih khawh ding in kan zuam lai," tiah a chim. Cun, Game dawr a hngakmi Laimi 2 hna zong biaruahnak kan ngeih hna i, an lung cu a fak ngaingai ko, nain upa nih khua nan khanmi cungah kan lung a tling ko tiah an ti kong zong a chim chap.
An tlaihmi 3 chungah Pa Van Lawm Sang nih, " tubantuk thilsual hi kan voikhat tuahnak a si ko. Kanmah zong zu kan rit lungin tubantuk thilsual kan tuah ngamnak hi a si. Kan i ngaichih tuk," tiah Seihnam sin ah a chim. Pa Van Lawm Sang le Pa Kyawkyaw Lwin hi Malay ah kum 3 renglo a um cangmi an si i, Pa Van Lawm Sang hi Wire rian a ṭuanmi a si i, Pa Kyawkyaw Lwin hi Game dawr ah rian a ṭuanmi a si.
"Mah zan hi zan khuadei te kan ke in kan vak hna. Imbi Penang dawr ah zu kan ding, mah ah cun tubantuk ruahnak kan ngeih hi a si. Inn ah kan ke in kan va ṭin ta i nam 2 kan va lak. Cu hnu ah kan rak kir ṭhan i tubantuk kan luh hnawh hna hi a si," tiah an tlaihmi hna 3 nih cun an chim. Phaisa 330 le telefawn 1 kan lak i telefawn cu Kawlpa sin ah RM 80 in kan zuar, tiah thil an tuahning kong cu an chim.
"Tubantuk thil hi kan miphun chungah kan ton bal lomi a si caah, khuakhan ding a har ngai. Nain a fakbikmi dantatnak cu kan innter ko hna lai," tiah CDAC chairman nih a chim. Kan miphun chungah hi thil lianngan hi kan phisin khawh ding a biapi ngai. Miphun dang le UNHCR, Malay palik nih an kan theih ahcun Laimi kan zate caah fahnak a tuar kho kan si caah, i ralrin ngai cu kan hau, tiah a chim chap.
Hi thilsual a tuahtu hna kong he pehtlai in zei bantuk dantatnak dah an pek hna lai i zeitindah tuah an si lai timi cu ceih le khan a um rih lo. Zeitik ah an kong ceih ding an si te lai timi cu chim khawh a si rih lo. An lak ah pakhat an tlaih khawh rih lo ruangah zeiti tuah awk an ṭha rih lo i, an tlaih cangmi hna 3 cu Imbi CDAC zung ah thir cincik in hren an si rih ko.
Ref: CSOMalaysia
12:50 am
Salai Aa Hu
